Barche Venessiane e Lagunari

La gondola sé la barca venessiana più famosa al mondo. L´origine del nome sé incerta, forse da un incroso del verbo "dondolar" col Grego Medieval kondura, barca a coa curta - de fati e gondoe antiche gaveva na pope tanto manco slanciada de quee de ancuo - o forse dal Latin cunula, cuna.

La Repubblica bandiva varie "Legi Suntuarie" par limitar i sprechi nel sfarso, in quanto i nobii e i mercanti gera tignii a sostener finansiariamente e imprese miitari e i rinovamenti architetonici de la Serenissima. Qualcheduna de ste Legi specificamente riguardava i pareci da gondola, ma par che l´obligo rigoroso al color nero gabia origine in un voto reigioso de Stato pronunsià in ocasione de una dee teribii pestiense che periodicamente decimava la Popolassion.

E regoe de costrussion sé severe, e impone calcoi asimetrici par e do fiancae (asimetria ciamada "lai", lati); la longhessa gà da esser de 10,75 metri e la larghessa interna de 1,38.
Ghe sé na variante, ciamada gondola da tragheto, più larga e manco inarcada, che vien usada par el trasporto de 15/20 persone da un lato a st´altro del Canal Grando nei pochi tragheti restai.

L´atual fisionomia de la gondola sé ben diversa da quea che se pol amirar nei quadri dei vedutisti del ´700 venessian. A chel tempo infati e gondole no gera asimetriche e gnanca rialsae da poppa parché e gera sempre vogae da do gondolieri. E gaveva na prova longa e co la coverta piata, par fasiitar l´imbarco e el sbarco dei pasegeri quando Venessia ancora no gaveva rive in muraura e pontii.

Col tempo, trasformandose sempre de più in barca de rapresentansa, la gondola gà modificà anca la coverta de prova, i fiuboni, che gà ciapà la sagoma a teto e se gà arichio de ornamenti a intajo, tarsia e doradura.

Par consentir che la gondola fusse manovrada più fasilmente da un solo vogador, se gà studià l´asimetria e el rialso da pope.

La gondola sé infati na barca che no gà ancora finio de evolverse: el so sesto, cioè la regola che stabiisse i raporti scalari dee ordinate nea so forma, vien spesso agiornà, soratuto par consentir a l´imbarcassion de soportar l´aumento de moto ondoso causà dae imbarcassion a motor.

Tradissionalmente, la gondola sé composta de 280 parti reaisae in oto tipi de egno: larese, albeo, rovere, olmo, sarieso, mogano, tijo e noghera; al giorno de ancuo però se ghe ne vede sempre de più fate de compensato marin.

E uniche parti in metalo, oltre ai vari feri o otoni del parecio, sé el fero da pope e queo da prova.
El fero da prova se ciama "dolfin" parché el ghe someja al muso del cetaceo: la so forma, cambiada anca ea nel corso dei secoi, vol evocar nea parte superior el Corno del Dose, nel fusto la sinuosità del Canal Grando, nel petene i Sestieri de la cità co la Giudecca (el dente oposto), co e ponte decorae fra dente e dente e isoe magiori de la Laguna.

El fero da pope invesse sé ciama "risso" par la forma imbovolada che ricorda forse el movimento del remo, e se ga fato sempre più picolo traverso i secoi.

La gondola sé usada ancuo esclusivamente par el trasporto de persone e par e regate.
Vedi anca: Dodesona, Quatordesona, Disdotona e Gondoin